2013年9月16日 - 好姐海水養魚場

2013年9月16日

人物: 龍人，Thomas

天氣: 唔知..好好風..約27-28度

地點: 好姐海水養魚場

時間: 7:15PM - 11:00PM

自908事件後，我地個釣魚心更加熾熱。奈何我地一班同事冇可能一齊請假，閒日釣魚就只可等放工。經上次既教訓後，我地決定先不理成本問題，目地就係釣到魚。所以今次先去金魚街買左$20泥鰍，(因為太心急，星期五晚已買定，所以到昨晚已死左一半，剩番10幾條) 放工再去荃灣買左2兩沙蝦。目地就係一人釣到一條就當成功。

新手開杆，上釣組，都用左半個鐘有多。上次見好多高手都有用浮波，所以今次問哂釣魚店點做浮波釣組，希望成功啦。點知..釣左成晚...我地2人既魚餌都冇咩魚食，經非官方統計，全晚加埋都唔夠5次有魚食。最後3個鐘只有一次誤打誤撞釣到一條，又係紅鮋。

走時問職員，佢話全日都冇咩人釣到魚，魚唔開口喎。同埋可能轉風向，都唔知真定假! 但我地又真係見到其他人都釣唔到咩魚。有位阿哥就由下午釣到晚上，有10幾口鳥頭。

走時做個賽後檢討
1) 相信生餌係冇問題既
2) 浮波用法唔岩，又唔識試水深，又唔知個釣組係唔係真係沉到落水
3) 問個好多人都話魚場最好用沉底，可能我地真係用錯方法
4) 會唔會夜晚去釣唔係咁好?最好都係早上9點左右開始釣?