呢位就係呢2日招呼我地既日本姐姐，全個旅館只有佢識英文。佢真係極好人，我搵佢幫我BOOK定熊本個晚上既食店，佢話怕我地唔識睇日文，佢竟然上網睇左個MENU，譯哂做英文。
9點半左右就出發去今日既景點，九重夢大吊橋。去時係要行山路，九曲十三灣，仲要好多個髮夾灣連埋一齊。我本人覺得如果冇渣開車去渣呢條路係有些難度。唔駛一個鐘就到啦，好多好多人。其實我之前諗緊黎唔黎，見到條橋後就諗...早知唔黎啦....!真係咁高。因為我都有畏高，但宜家後悔都冇用啦，唯有死頂。我拖住大公子，老婆拖住二公子，我飛咁快咁行過橋。大公子就一路望住下面，嘩....見底架..我叫大公子唔好望下面，向前望就冇事架啦。大公子話都唔驚，但佢隻手就濕哂囉，係咁出手汗，唔驚就有鬼。反而老婆同二公子真係唔驚，慢慢行同埋成日停係到影相。佩服!
九重"夢"大吊橋
日本大分県玖珠郡九重町田野１２０８
TEL: 0973-73-3800
風景係唔錯
終於行完啦，出發去阿蘇既Cuddly Dominion，落山又係頭文字D，髮夾灣呀~~~正!! 自駕有個好處，就係見到有好風景就可以停低睇下影下相。
去到Cuddly Dominion, 主要係去睇香港人好熟既宮澤劇場，見我地心愛既阿笨與阿占。隻馬騮當然唔係我地成日見住個隻啦，但確實好好睇。雖然唔知佢地講乜，但你睇佢地既動作同表情，都笑到收唔到聲。
Cuddly Dominion
熊本県阿蘇市黒川2163 TEL: 0967-34-2020
呢個Cuddly Dominion其實係個動物園，都有一部份有好多動物係到行黎行去。另有一部份有好多熊人，跌左落去就真係咁先。午餐就係園內食店，食個熊本拉面，一個字"好味"!
沒有留言:
張貼留言