2013九州親子自駕遊－福岡 (Day 1)

終於到了7月30日，一早就叫醒2位公子，但2位都唔係好願起身。唔通因為大公子好耐冇去過旅行，唔記得左旅行係乜東東? 二公子對上一次去旅行係手抱，即係去左等如冇去啦，所以更加唔知咩叫旅行。





















去到登機閘口，發現今次搭既港龍 (KA386) 係架細機。如果有得選擇，我下次唔會再搭細機，因為細機係冇電影睇的!

起飛時間係早上11:40，到福岡係下午3:40。福岡空港其實係市區入面，感覺好似去左啟德機場，正! 地鐵在國內線個邊，我地只係要搭2個站既免費巴士就可以到。之後又搭2個站地鐵就去到博多站。

今晚住在博多站對到正既博多都酒店，都幾方便。去到酒店大約5點左右。因之前在網上訂左張SIM CARD，CHECK IN時酒店職員就俾埋我。上房就拿拿林試下得唔得，攪左15分鐘左右終於攪掂。

博多都ホテル

〒812－0013
福岡県福岡市博多区博多駅東2-1-1（博多）
TEL : 092-441-3111

好啦，出發去行街睇野，先去搭地鐵去大名區探下猿人，之後就行過去天神區。帶住2位公子加上天氣好熱，行左半個鐘已好辛苦了。

沿路見到一風堂總店。

一路行，大公子就話好肚餓，咁岩見到間壽司店，諗都唔諗就入去事旦食幾件。

食完之後，行去中洲附近睇下屋台係乜樣。係橋左右有好多屋台，黎到梗係要試下啦。叫左2碗拉面同幾串串燒。好老實，真係普普通通，特別之處就係"熱"，仲要係唔平。我諗冬天去食可能會好些。唔知係唔係因為放假心情放鬆既關係，總係覺得人地既地方係特別靚。

之後睇下地圖，原來去天神/祇園地鐵站同去博多地鐵站好似差唔多遠，所以我地決定行番酒店。唔駛講..2位公子梗係不停話好熱同好倦啦。