今天終於踏上返福岡既路程,轉眼間就行左北九州一個圈,當然仲有好多地方未去到。早上熊本景色,天陰,有雨。
查實七天既時間真係完全唔夠。不過你俾十七天我都一樣唔夠架啦..哈哈! 轉上去國道冇幾耐就有一個大休息站 - 北熊本。就係到食個早餐先。
叫左個熊本拉面同牛肉烏冬。估唔到休息站既拉面都咁好食!
原本一個鐘左右就可以到佐賀縣既鳥栖 Tosu Premium Outlets,但因為落大雨,係大到睇唔到前面路,所以要行多半個鐘到。Outlets呢樣野,你鐘意既咪買到窮,唔鐘意既,15分鐘就行哂架啦。我地天生購物狂,正價既又鐘意,大減價又鐘意,我地由10:30掃到13:30,剩係POLO都幾袋,死未? 唔係趕住要食午飯同落大雨,我諗都唔捨得走。
鳥栖 Tosu Premium Outlets
佐賀県鳥栖市弥生が丘8-1
TEL: 0942-87-7370
人人去九州,都一定要食佐賀和牛,咁食佐賀和牛都主要會去季樂。因為我地冇去到佐賀市,所以就諗住福岡個晚去博多季樂到食既,博多季樂有2層,2階係食燒肉,3樓就食鐵板燒。我第一日到福岡就叫左酒店哥哥幫我BOOK 3樓,點知原來晚上鐵板燒係唔招呼7歲以下小朋友,咁我地只可BOOK 2樓啦。上網SEARCH一SEARCH,鳥栖季樂係好近個OUTLETS,5分鐘就渣到去。反正都只可以食燒肉,咁我地就WALK IN去啦,咁晚上係福岡就可以食其他野。去到13:45,LAST ORDER係14:00,都冇關係啦,叫左就可以慢慢食到15:00。門口有個排隊表,12:00時係大爆滿,我地去到時都散哂咁制。咁梗係啦,我諗只有香港人先咁遲食飯同咁唔定時食。
鳥栖季樂
鳥栖市田代大官町812番地5
TEL: 0942-85-8010
叫左個佐賀牛3-4人SET,真係唔識講..好好味。
佐賀和牛
縣產和牛
佐賀骨太有明雞
豬肉
沒有留言:
張貼留言