013九州親子自駕遊－白川水源, 熊本 (Day 5)(Part 1)

去溫泉旅館住，晨早起身去浸就一定係指定動作，加上呢次係呢個旅程最後一次浸溫泉，更加唔捨得，所以又係６點幾就起左身。呢到既早餐時間係指定７：３０－８：３０，所以今日既活動時間總係覺得係較充足。

日本既早餐真係絕對唔會餓親你，又係份量十足。

出發去參觀呢到必去既景點　－　白川水源。泉眼我都未見過，所以好期待泉眼係點模樣。

白川水源
日本熊本県阿蘇郡南阿蘇村大字白川2040
TEL: 0967-62-0318

水．．真係清到冇朋友。見日本人個個都係到飲泉水，我地跟一跟。真係好清涼的。

見到個泉眼，就係黑色有氣泡湧出黎個到。呢個泉眼原來每分鐘湧出６０ＴＯＮ水，相當多。泉眼附近既水都好平靜，更加令個湖面好似塊鏡咁。同一時間，真係好想去睇下黃河同長江既泉眼係點樣既。

終於要同九州既鄉郊講拜拜，出發到熊本，個幾鐘車程就到啦。拿拿林去睇下個熊本城先。上次我去參觀大阪城係暑假，成３７度高溫，差些命喪於大阪城。今次又係有成３３－３５度。見到個城時都有些驚。

熊本城
熊本市本丸町1-1
TEL: 0963-52-5900

唔知係唔係我對日本幕府時期比較有興趣，所以呢類城池我都好有興趣去睇。全日本有大約５０個幕府城池，唔知有冇機會去哂。

行行下見到個日本古代人向我地招手，唔係咁邪呀？！

由天守閣頂層望出熊本市既風景。

今晚全既酒店－熊本日航係正市中心，所以我地１點左右先去酒店Check-In，放低架車。然後出去食午餐。老婆係超鐘意係魚生壽司，而我就喜歡食拉面。黎到九州咁多日，主要都係食旅館定左既餐。所以我一早搵左間食活魚，點知．．人地只係開夜晚架．．．大佬你下次查野查清楚先啦！

死火，冇左目標，加上又熱，又疲，拖住２個小朋友．．大獲！好彩老婆搵到間壽司店，Menu都唔睇就衝入去。睇佢個格局唔會平，所以咁仲安心，好大機會會滿足到我老婆。

峰壽司
熊本市安政町5-4
TEL: 096-324-4500

叫左魚生定食，壽司定食，魚生拼盤同埋我最鐘意既墨魚。今次真係冇得頂，魚生真係好好味！大家都開心哂。但呢餐要12000YEN。