2014泰國遊 (DAY1)

2014年5月22-25日，四日三夜泰國遊。機票是大半年前用ASIA MILES換番黎的。在5月20日，出發前2天，泰國陸軍總司令巴育宣佈全國戒嚴，呼吁所有團體立即停止對峙活動。香港旅遊警示仍維持在黃色。呢個時候真係十五十六，唔知仲去唔去好，最後就當然去左啦。

5月22日早上08:50，坐國泰機，當地11點幾就到達啦。第一時間在機場買左電話上網卡先，平到你唔信，多人到你唔信! 299B七天任用。

坐機場鐵路轉BTS就去到酒店，今次住對到正四面佛既洲際酒店，就係CHIT LOM BTS站隔離，極方便。

酒店望出去CENTRAL WORLD，未行出去都知道熱到癲。

出發去食LUNCH，先去水門區，行過去15分鐘左右，食下海南雞飯先。叫左2碟雞飯，老鴨湯，苦瓜湯，你睇隻雞，白哂哂~~!好唔好食呢?我就覺得過得去，但2個湯同例湯就好飲到不得了。呢到食野最大件事係冇冷氣，一路食一路滴油~~!!!

之後就去做SPA，老婆一早就約左15:00，做4個鐘。間SPA唔記得由邊個BTS再轉TAXI去。個環境確實唔錯，好彩係坐車去，如果行過去，做咩SPA都冇用，因為已熱死左。

做完19:00出黎，一開番個電話，幾十個MESSAGE彈出黎，原來係我地SPA緊時，巴育就發動左政變，實施左宵禁，所以人在22:00-05:00係唔可以出街。嘩~~第一次見到政變，你都咪話唔驚。之後收到風話BTS會在21:00就停止服務，個下仲驚。小姐幫我地CALL左好耐車，終於CALL到架篤篤去BTS站，去到BTS時已19:45，但好奇怪，呢個站係冇人既~~!

但返到CHIT LOM，人山人海呀。

DINNER都未食，只可以去酒店既餐廳食啦，去泰國就食泰菜啦。

好味就好味，但價錢就......~~!!返到房，睇電影，所有泰國電視台都係咁樣。